Елімізде санитарлық-эпидемиологиялық қадағалау қызметін күшейтудің 6 бағыты белгіленді

Елімізде санитарлық-эпидемиологиялық қадағалау қызметін күшейтудің 6 бағыты белгіленді
378 қаралу саны

Денсаулық сақтау министрі Елжан Біртановтың қатысуымен COVID-19 індетіне қарсы күрес шараларын әзірлеп, санитарлық-эпидемиологиялық қызметті жетілдіру бойынша жұмыс тобының отырысы өтті.  

Жиынның өткені туралы министрліктің Facebook парақшасында хабарланды. Отырыс барысында негізінен санитарлық-эпидемиологиялық қызметті күшейту жұмыстары қаралды. «Мәселенің ауқымының кең екені түсінікті. Алайда, ондағы міндеттерді алдағы екі-үш айда жүзеге асыруға болатындай жұмыс жүргізу керек» деді Елжан Біртанов.

Бас мемлекеттік санитарлық дәрігер Айжан Есмағамбетованың айтуынша, бүгінде Қазақстанда санитарлық-эпидемиологиялық қадағалау қызметін күшейтуге бағытталған бірқатар шара әзірленіп жатыр. Өзгерістер алты бағытта жүргізіледі:

  • Тауарлар мен қызметтердің сапасы мен қауіпсіздігін бақылау комитетінен санитарлық-медициналық бақылау қызметін жеке шығара отырып, қайта құру жоспарлануда.
  • Сонымен қатар бас мемлекеттік санитарлық дәрігердің мәртебесі мен өкілеттігі де артады.
  • Эпидемиологиялық қызметтің штат саны көбейіп, эпидемиологтар арнайы мемлекеттік орган ретінде артықшылықтарға ие болады.
  • Осы шаралардың аясында мемлекеттік шекарада санитарлық-карантиндік бақылауды күшейтіп, санитарлық-эпидемиологиялық қызметтердің материалдық-техникалық жабдықталуын жақсарту көзделген. Яғни, олар тепловизормен, көлік құралдарымен және кеңсе жабдықтарымен жарақтандырылады.
  • Сонымен қатар бас мемлекеттік санитарлық дәрігердің өкілеті кеңейтіліп, енді ол өз Қаулысымен елдің бүкіл аумағында шектеу шараларын енгізіп, қайта алып тастай алады.
  • Бұл ретте нормативті-құқықтық акт мемлекеттік тіркеуге жатпайды. Қазіргі уақытта осы жағдай кедергі келтіріп тұр. Себебі, өзгерістер бір-ақ апта ішінде енгенімен, тіркеу үрдісі одан да ұзақ уақытты алып жатыр. Бас мемлекеттік санитарлық дәрігер мемлекеттік шекара арқылы өткізу бекетінен кіргізу және шығару бойынша шектеулерді енгізе алады. Карантин аумағын белгілеп, күзетілген аумақта эпидемияға қарсы шараларды толыққанды үйлестіреді.

Дереккөз: ҚР ДСМ Facebook парақшасы

Фото дереккөзі: Сhinaminutes.com

Бөлісіңіз